En 1.963 a Real Academia Galega acordou declarar o día 17 de maio de cada ano como "Día das Letras Galegas", data na que se conmemoraba a publicación da obra de Rosalía de Castro "Cantares Gallegos". A Academia considerou que dita obra veu darlle prestixio universal a nosa lingua. Medio século máis tarde seguimos celebrando cada 17 de maio unha data significativa para as nosas letras. Este ano o autor homenaxeado é Roberto Vidal Bolaño, o máis importante dramaturgo galego. Preme aquí e accederas a materiais para coñecelo mellor.
Tamén podedes ver este vídeo feito polo alumnado do CEIP Pedrouzos Brión
Ademais, seguindo coa homenaxe a Celso Emilio Ferreiro podemos ler un poema da súa autoría no que fai unha encendida defensa do galego:
"DEITADO FRENTE AO MAR"
Lingoa proletaria do meu pobo,
eu fáloa porque si, porque me gosta,
porque me peta e quero e dame a gana;
porque me sai de dentro, alá do fondo
dunha tristura aceda que me abrangue
ao ver tantos patufos desleigados,
pequenos mequetrefes sin raíces
que ao pór a garabata xa non saben
afirmarse no amor dos devanceiros,
falar a fala nai,
a fala dos abós que temos mortos,
e ser, co rostro erguido,
mariñeiros, labregos da lingoaxe,
remo i arado, proa e rella sempre.
Eu fáloa porque si, porque me gosta
e quero estar cos meus, coa xente miña,
perto dos homes bos que sofren longo
unha historia contada noutra lingoa.
