XUNTANZA DAS BIBLIOTECAS DE REDONDELA

     O martes, 26 de novembro, unha vez máis neste curso, reunímonos as Responsables das Bibliotecas Escolares e Municipais do noso Concello. No afán por coordinarnos e facer actividades conxuntas, estivemos perfilando dúas propostas de colaboración: unha, a elaboración dun Cómic colectivo sobre lendas de Redondela. O noso colexio aportou en Banda deseñada a historia da Muller- serpe, a Lenda da moura, confeccionada polo alumnado que agora está en 6º de Primaria. Pediremoslle ao Concello que nolo edite. A segunda proposta é facer unha gravación radiofónica intercentros en "Ponte nas Ondas", que ilustraría unha viaxe multifacética por Redondela.

 

 

      Terémosvos informados segundo vaiamos perfilando estas actividades.

VISITA Á BIBLIOTECA DE REDONDELA

Como ven sendo costume dende hai uns cantos anos organizamos, en colaboración coa Responsable da Biblioteca  Pública de Redondela, unha visita á mesma.
Así, o 27 de marzo, o noso alumnado de Infantil de 5 anos e de 3º de Primaria coñeceu as súas instalacións e asistiu a unha actividade de animación á lectura coa conta contos  Leo.

Entre outros, narrou e representou estas historias: “ O tambor máxico ”, “ Unha de piratas ” e “ A arboriña Risiñas ”.

Tamén cantou a un público, totalmente entregado e agradecido, cancións como “ Teño unha formiguiña na patiña”.

                                      

VISITA Á BIBLIOTECA DE REDONDELA

O alumnado de 5 anos de Infantil máis o de 3º de Primaria realizou unha visita, organizada pola Biblioteca do noso Colexio, á Biblioteca Pública de Redondela para coñecer as súas instalacións e tamén para asistir á actuación da contacontos Charo Pita co seu espectáculo "Menú de contos".

É esta unha iniciativa, recollida na nosa Programación Xeral Anual, de cara á animación á lectura e que pretendemos manter en anos vindeiros para que todo o noso alumnado, ao longo da súa permanencia no Colexio, poida achegarse ata a que será a súa Biblioteca Pública de referencia.

II ENCONTRO DE BIBLIOTECAS ESCOLARES E MUNICIPAIS DE REDONDELA

As responsables das Bibliotecas Escolares e Municipais de Redondela reunímonos o 23 de setembro para coordinar actividades cara a desenvolvelas conxuntamente neste curso 2010-11. Adiantámosvos algunhas das posibles:

- Xornadas de formación sobre "banda deseñada" para mestres/as co ilustrador Gochi, creador da Editorial "Cerditos de Guinea" http://www.cerditosdeguinea.com/

- "Maletas viaxeiras" que a Biblioteca de Redondela achegará aos Centros Escolares en forma de préstamo interbibliotecario, con "cómics" para público infantil, xuvenil e adulto.

- "Semana do Libro: A festa da palabra". Autocaravana para "transportar a lectura" con libros en varias linguas.

Iremos dándovos conta de todo o que vaiamos realizando.